Հունվարի
25-ին ՀՀ պաշտպանության նախարար Սեյրան Օհանյանը Երևանի պետական
համալսարանում հանդիպեց ԲՈՒՀ-երի պրոֆեսորադասախոսական կազմի և ուսանողական
խորհուրդների ներկայացուցիչների հետ:
Ողջունելով միջոցառման մասնակիցներին` պաշտպանական
գերատեսչության ղեկավարը հակիրճ անդրադարձավ ՀՀ ԶՈՒ ստեղծման պատմությանը և
կայացման ու զարգացման փուլերին: Ս. Օհանյանն ընդգծեց, որ մեր բանակը
կազմավորվել է պատերազմական ժամանակաշրջանում, իսկ 1994թ. մայիսյան
զինադադարի հաստատումից հետո սկսվեց բանակաշինության որակապես նոր
գործընթաց, որի արդյունքում այսօր մենք ունենք մարտունակ ու կանոնավոր
բանակ` հայ ժողովրդի անվտանգության երաշխավորը:
Կարևորելով երիտասարդության դերը` Սեյրան Օհանյանն իր ելույթում խոսեց նաև
բանակ-ուսանողություն կապի ամրապնդման, երիտասարդության
ռազմահայրենասիրական դաստիարակության խնդիրների և դրանց ուղղությամբ
իրականացված ու նախատեսվող աշխատանքների մասին: Նախարարն անդրադաձավ նաև
ազգային բանակում իրականացվող բարեփոխումներին, կադրերի պատրաստման
գործընթացին և բանակային կյանքի կարևոր այլ խնդիրների:
Այնուհետև Սեյրան Օհանյանը պատասխանեց ներկաներին հետաքրքրող հարցերին,
որոնք հիմանականում վերաբերում էին ԼՂ հակամարտության կարգավորման
գործընթացին, պատերազմի վերսկսման հավանականությանը, 18 տարին լրացած
արական սեռի ՀՀ բոլոր քաղաքացիներին զինված ուժեր զորակոչելու խնդրին և այլ
թեմաների: Հնչեցված բոլոր հարցերին պաշտպանության նախարարը տվեց սպառիչ և
բավարար պատասխաններ:
Հանդիպման ավարտին ռազմահայրենասիրական
դաստիարակության, բանակ-ուսանողություն կապի ամրապնդման գործում ներդրած
ավանդի և բանակի կազմավորման 18-ամյակի կապակցությամբ մի խումբ համալսարանականներ պարգևատրվեցին գերատեսչական մեդալներով,
պատվոգրերով, հուշամեդալներով և արժեքավոր նվերներով, այդ թվում՝ԵՊՀ «Վարդանանք» ռազմահայրենասիրական դաստիարակության ակումբի նախագահ Սաթենիկ Աբրահամյանը պարգևատրվեց ՀՀ զինված ուժերի «Վազգեն Սարգսյան» մեդալով, իսկ նույն ակումբի և «Հայրենապաշտ» ՀԵՀԿ խորհրդի անդամ, ԵՊՀ ռադիոֆիզիկայի ֆակուլտետի մագիստրատուրայի 1-ին կուրսի ուսանող Արշակ Ծառուկյանը՝ արժեքավոր նվերով։
Շնորհավորում եմ տ. Սաթենիկին մեդալով պարգևատրվելու համար ու ցանկանում, որ իր կատարած բոլոր գործերը միշտ արժանավույնս գնահատվեն։ Ինչպես նաև շնորհավորում եմ իմ սիրելի Արշակին։ Արշակ ջան, միշտ այդպես:
Մեկնաբանություններ կարող են թողնել միայն գրանցված օգտագործողները [ Գրանցում | Մուտք ]
