Հարազրույց «Հայրենապաշտ» հայրենասիրական, երիտասարդական հասարակական կազմակերպության Խորհրդի անդամ Մարտին Մովսիսյանի հետ:
-Ե՞րբ եւ ու՞մ կողմից է հիմնադրվել կազմակերպությունը: Եվ ինչու՞ հատկապես «Հայրենապաշտ»:
-«Հայրենապաշտ» հայրենասիրական երիտասարդական հասարակական
կազմակերպությունը Հայաստանի Հանրապետության պետական ռեգիստրի կենտրոնական
մարմնի կողմից իրավաբանական անձի վկայական է ստացել 2008 թվականի մայիսի 13-ին: «Հայրենապաշտ»
ՀԵՀԿ-ի հիմնադիր անդամներն են Մարտին Մովսիսյանը, Արմեն Գրիգորյանը,
Էդվարդ Կարապետյանը, Արշակ Ծառուկյանը, Ահարոն Կարապետյանը, Թամարա
Խոյեցյանը, Լուսինե Ծառուկյանը եւ Յանա Շախրամանյանը:
«Հայրենապաշտ» բառն իր մեջ պարունակում է երկու հիմնական խորհուրդ.
հայրենիքի պաշտպան եւ հայրենիքի պաշտամունք: Երկու խորհուրդները սերտորեն
կապված են միմյանց եւ ներառված են այս բառում: -Ի՞նչ գաղափարախոսություն է հետապնդում կազմակերպությունը:
-Մենք ընդունում եւ փորձում ենք մեր մեջ կրել բոլոր այն
գաղափարախոսությունները, որոնք միտված են մեր ազգի բարօրությանը ու
պետականության հզորացմանը: Մենք մեծարում եւ սրբացնում ենք հայ ազգի համար
անձնազոհ անհատներին ու մարտիկներին: Հայրենապաշտ լինել նշանակում է լինել
նաեւ բարեպաշտ ու օրինապաշտ: Դույզն ինչ վտանգի դեպքում հայ երիտասարդը
պարտավոր է կանգնել բանակի` իր եղբայրների կողքին: Հարգանքի արժանի չէ այն
երիտասարդը, ով պատրաստ չէ պաշտպանել իր հայրենիքն ու ընտանիքը: Մենք մեր
առօրյա կյանքում պետք է փորձենք մեր ներդրումն ունենալ պետականության
հզորացման գործում: Եթե հայ ժողովրդի մեջ հայրենանվեր մարդիկ
մեծամասնություն կազմեն, ապա մեր ապագան կլինի պայծառ ու լուսավոր: -Կա՞ր, արդյոք, նման կազմակերպություն ստեղծելու անհրաժեշտությունը:
-Այո´, ինչքան շատ լինեն հայրենասեր ու հայրենանվեր առողջ ուժեր, այնքան
ամուր ու ապահով կլինի մեր երկրի թիկունքը: Մենք` բոլորս, պետք է
հասկանանք` կապ չունի, թե որ կազմակերպությունը կամ կուսակցությունն ենք
ներկայացնում, ազգային շահը պետք է միշտ վեր դասենք թե´ կուսակցական, թե´
անձնական բոլոր տեսակի շահերից: Կազմակերպությունը հարու՞մ է իշխանական կամ ընդդիմադիր որեւէ կուսակցության կամ գաղափարախոսության:
-Ո´չ... Մենք հարգում եւ ընդունում ենք բոլոր հայրենասեր ու հայրենանվեր
գործիչներին եւ կառույցներին: Մեզ համար միեւնույն է, թե նրանք ո՞ր
կուսակցությունն են ներկայացնում, եւ համարում ենք, որ թե´ իշխանությունը,
թե´ ընդդիմությունը մեզ են ներկայացնում: Ինչպես նշեցինք նախորդ
պատասխանում, գաղափարախոսկան առումով մենք սահմանափակ դիրքորոշում
չունենք: Գրեթե բոլոր կուսակցությունների գաղափարախոսությունները թղթի վրա
լավ են նայվում, կարեւորն այն է, որ նրանք կյանքում էլ հետեւեն իրենց
գաղափարներին եւ կատարեն խոստումները: Ինչեւէ, մենք լավատես ենք: -Ի՞նչ գործունեություն է իրականացրել կազմակերպությունը մինչեւ օրս:
-Բազմաբնույթ եւ ընդարձակ: Օրինակ` բարեգործական. այցելություն Մարի
Իզմիրլյանի անվան մանկատուն, որն իրականացվեց Արագածոտնի մարզի ԵՄԿԿ
ՊՈԱԿ-ի հետ համատեղ: Այցելության ժամանակ երեխաներին բազմաթիվ նվերներ
հանձնեցինք: Ռազմահայրենասիրական եւ բնապահպանական, օրինակ` ծառատունկ եւ
տարածքի բարեկարգում «Արծվի թեւ» հուշակոթողը եզերող տարածքում
/հուշարձանը նվիրված է Վանի հերոսամարտին եւ գտնվում է Արագածոտնի
մարզում/, որն իրականացրեցինք ԵՊՀ «Վարդանանք» ռազմահայրենասիրական
դաստիարակության ակումբի հետ համատեղ: Մայրաքաղաքում եւ մի քանի
մարզերում փակցրել ենք մոտ 2000 թռուցիկներ` «Ճանաչենք ազգային
հերոսներին» եւ «Հայրենաշունչ պատգամներ» խորագրով եւ հայրենանվեր
բովանդակությամբ: Վերջերս լույս տեսան զոհված ազատամարտիկների նկարներով
մեր առաջին օրացույցները, «Նրանք մեզ հետ են» խորագրով ... Պաշտպանության
նախարարության եւ Հայաստանի ուսանողական ֆորումի հետ համատեղ մայիսի 5-ին
ու 6-ին իրականացրեցինք միջոցառում՝ նվիրված Եռատոնին: Միջոցառման
ընթացքում խորհրդանշական 9 մարզաձեւերում, տարբեր բուհերի ուսանողներ
մրցեցին Հայոց բանակի կուրսանտների հետ: Հաղթողներին պարգեւատրեց անձամբ
պաշտպանության նախարար Սեյրան Օհանյանը: Մենք նշեցինք մեր իրականացրած
միջոցառումների մի մասը միայն: Մենք կրկնակի ենք հպարտանում մեր
իրականացրած միջոցառումներով, քանի որ դրանք իրակնացվում են զուտ մեր
միջոցներով եւ մեր ակտիվ անդամների ու գաղափարական ընկերների տրամադրած
միջոցների հաշվին: Այս ընթացքում խորքային աշխատանք է տարվել նաեւ նոր
գիտելիքների ձեռք բերման, փորձի փոխանակման, ոգեղեն արժեքներ կրելու եւ
դրանք տարածելու գործում: Մեր անդամներն ակտիվորեն իրենց դրսեւորում են
նաեւ կազմակերպությունից դուրս եւ հասանելի տարածքում գրեթե բաց չեն
թողնում որեւէ միջոցառում կամ նախաձեռնություն, որ կարող է փոքր-ինչ
հետաքրքրել հայ երիտասարդին, հայ մարդուն: -Առաջիկայում ի՞նչ ծրագրեր են նախատեսված:
-Մենք նախընտրում ենք խոսել գործերով: Միայն նշենք, որ «Հայրենապաշտ»
ՀԵՀԿ-ն բաց է համագործակցությունների համար: Մեր մտքերը բազմազան են,
էներգիան` անսպառ, մնացածը ցույց կտա ժամանակը:
